راولپنڈی

محکمہ ہائر ایجوکیشن پنجاب نے 40 کروڑ کی لاگت سے لاہور سمیت پنجاب کے کالجز کی کمپیوٹر اور سائنس لیب کی اپ گریڈیشن کا فیصلہ کرلیا، منصوبے پر نئے مالی سال کے آغاز سے کام شروع کر دیا جائے گا۔

لاہور سمیت پنجاب بھر کے بیشتر کالجز میں قائم کمپیوٹر اور سائنس لیبارٹریز میں سہولیات کا فقدان ہے۔ سہولیات پورا کرنے کیلئے محکمہ ہائر ایجوکیشن نے جامع منصوبہ تشکیل دے دیا ہے۔ مذکورہ منصوبے کے تحت تمام کالجز میں موجود لیبز کو اپ گریڈ کرنے کا فیصلہ کیا گیا ہے۔ حکومت پنجاب نے منصوبے کے لیے نئے مالی سال کے ترقیاتی بجٹ میں 40 کروڑ کی خطیر رقم مختص کی ہے۔

محکمہ ہائر ایجوکیشن کے افسران کا کہنا تھاکہ کالجز میں کمپیوٹر اور سائنس لیبز کی سہولیات نہ ہونے کے مترادف ہےجس کے باعث طلبہ پریکٹیکل فیلڈ میں بہت پیچھے ہیں۔ عالمی تعلیمی معیار کے مطابق پریکٹیکل نصاب سے زیادہ اہمیت کا حامل ہے۔ منصوبے پر نئے مالی سال کے آغاز میں کام شروع کر دیا جائے گا۔

منصوبے کے تحت لیبز میں جدید کمپیوٹرز جبکہ سائنس لیبز میں جدید آلات طلبا کو پریکٹیکل ورک کے لیے فراہم کیے جائیں گے تاکہ طلبہ تھیوری کے ساتھ ساتھ پریکٹیکل ورک کو بھی بہتر طریقے سے سمجھ سکیں۔