لاہور

پنجاب میں بڑھتے ہنگامی حالات کے پیش نظر سرکاری یونیورسٹیوں نے اپنے شیڈول کے مطابق ہونے والے امتحانات کو ملتوی کرنے کا اعلان کر دیا ہے۔

سرکاری یونیورسٹیز کے تحت ستائیس اور اٹھائیس نومبر کو ہونے والے امتحانات کو ملتوی کیا گیا ہے جبکہ امتحانات کا نیا شیڈول بعد میں جاری کیا جائے گا۔ پنجاب یونیورسٹی لاہور، بہاؤ الدین زکریا یونیورسٹی ملتان، اسلامیہ یونیورسٹی بہاولپور، لاہور کالج فار ویمن یونیورسٹی، فاطمہ جناح ویمن یونیورسٹی راولپنڈی، جی سی یونیورسٹی لاہور، گورنمنٹ کالج یونیورسٹی فیصل آباد نے اپنے امتحانات ملتوی کیے ہیں۔

صوبے کی دیگر سرکاری جامعات نے بھی اپنے امتحانات ملتوی کرنے کا اعلان کر دیا ہے۔ اس ضمن میں طلباء کو ہدایات جاری کی گئی ہیں کہ وہ اپنی اپنی یونیورسٹی سے ان امتحانات سے متعلق تفصیلات حاصل کر سکتے ہیں۔

مذہبی تنظیموں کی جانب سے احتجاجی مظاہروں اور راستوں کی بندش کے باعث یونیورسٹیوں نے امتحانات کو ملتوی کیا ہے تاکہ طلباء کو پریشانی کا سامنا نہ ہوسکے۔