اسلام آباد

وفاقی دار الحکومت کے ماڈل اور ایف جی سکولز کالجز کے ڈیلی ویجز ملازمین نے اپنے مطالبات کے حق میں تعلیمی بائیکاٹ کا آغاز کر کے اسلام آباد پریس کلب کے سامنے دھرنا احتجاج کا آغاز کر دیا۔

احسن بنگش، ندیم طوری، احسان سکندری، محمد عادل، فہد معراج اور میڈم سکینہ نے خطاب میں کہا کہ وزارت کیڈ کے تحت وفاقی نظامت تعلیمات کے ذیلی تعلیمی اداروں میں اساتذہ اور عملہ 8ماہ سے تنخواہوں سے محروم ہیں۔

اسلام آباد ہائیکورٹ اور قائمہ کمیٹی کیبنٹ سیکرٹریٹ نے مستقل کرنے کا حکم دیا‘ جبکہ سیکرٹری کیڈ نے بھی 2013ء میں مستقل کرنے کا نوٹیفکیشن کیا مگر اُنہیں یومیہ اجرت سے بھی محروم کر دیا گیا ہے۔

رکن قومی اسمبلی اسد عمر‘ شیریں مزاری‘ سنیٹر بیرسٹر سیف اور سبط شاہ نے کہا کہ حکومت نے مسئلہ حل نہ کیا تو اسے آئندہ پارلیمنٹ کے اجلاس میں اٹھائیں گے۔

ادھر وزیر کیڈ ڈاکٹر طارق فضل چوہدری کی ہدایت پر ڈپٹی میئر اسلام آباد چوہدری رفعت جاوید اور ذیشان نقوی نے احتجاجی اساتذہ سے ملاقات کی تاہم اُنہوں نے احتجاج ختم کرنے سے انکار کردیا۔ ادہر مظاہرین کی 6رکنی کمیٹی جمعرات کو وزیر کیڈ سے ملاقات کرے گی۔