کوئٹہ

ہائر ایجوکیشن کمیشن نے بلوچستان اور فاٹا کے طلباء کے لیے سکالر شپ حاصل کرنے کے شیڈول کا اعلان کر دیا ہے یہ سکالر شپ ان طلباء کو پاکستان کی کسی بھی سرکاری اور ڈبلیو کیٹیگری کی پرائیویٹ یونیورسٹی میں داخلہ حاصل کرنے پر دی جائے گی۔

ایچ ای سی کے مطابق اس سکالر شپ کے لیے وہ طلباء اہل تصور کیے جائیں گے جن کی 16 اگست تک عمر زیادہ سے زیادہ 22 سال ہو، ایف ایس سی میں کم ازکم 60 فیصد نمبرز حاصل کر رکھے ہوں اور ان کے پاس بلوچستان یا فاٹا کا ڈومیسائل ہونا بھی لازمی ہے۔

اس سکالر شپ کے ذریعے سے ان طلباء کی فیس اور ہاسٹل کے اخراجات اُٹھائے جائیں گے تاہم اس کی حد بھی 60 ہزار روپے فی سمیسٹر مقرر کی گئی ہے۔

طلباء کو رہائشی الاؤنس 5 ہزار روپے ماہانہ، بُک الاؤنس 5 ہزار روپے سالانہ اور ابتدائی طور پر بلوچستان سے کسی اور صوبے میں شفٹ ہونے کے لیے 10 ہزار روپے الاؤنس دیا جائے گا۔

اس سکالر شپ کے لیے بلوچستان اور فاٹا کے طلباء کا کوٹا پچاس پچاس فیصد مختص ہے اور اُمیدواروں کو ایچ ای سی کا سپیشل ٹیسٹ بھی پاس کرنا ہوگا۔

ایچ ای سی سکالر شپ حاصل کرنے کے لیے آخری تاریخ 18 اگست مقرر کی گئی ہے اور اس سے متعلق تمام تر تفصیلات ایچ ای سی نے اپنی ویب سائٹ پر بھی جاری کر دی ہیں۔