لاہور بورڈ کا فرسٹ ایئر کے پرچوں کی ری چیکنگ مفت کرنے کا اعلان

    October 14, 2016 7:38 pm PST
taleemizavia single page

لاہور

چیئرمین انٹرمیڈیٹ اینڈ سیکنڈری ایجوکیشن بورڈ اسماعیل چوہدری کی جانب سے جاری کردہ نوٹیفکیشن کے مطابق فرسٹ ایئر کے پرچوں کی ری چیکنگ بغیر فیس کے ہوگی۔

پرچوں کی ری چیکنگ کی درخواستیں جمع کرانے والے طلباء سے پیسے وصول نہیں کیے جائیں گے۔

جمعرات کے روز لاہور کے سرکاری و نجی کالجوں کے طلباء نے بورڈ انتظامیہ کے خلاف پرچوں کی چیکنگ پر عدم اعتماد کے باعث احتجاجی مظاہرہ کیا تھا۔

احتجاجی طلباء نے بورڈ سے مطالبہ کیا تھا کہ فرسٹ ایئر کے پرچوں کی چیکنگ میں بڑے پیمانے پر غلطیاں ہیں لہذا ان پرچوں کی ری چیکنگ کرائی جائے۔

طلباء نے بورڈ حکام پر یہ بھی الزام عائد کیا کہ اُردو، کیمسٹری اور بائیولوجی کے مضامین کے پرچوں کی چیکنگ پر اُنہیں تحفظات ہیں۔

جمعرات کو پنجاب اسمبلی کے سامنے احتجاج کے دوران طلباء نے ٹریفک بھی بلاک کر دی تھی۔ احتجاجی طلباء کے ساتھ بات چیت کے لیے چیئرمین لاہور بورڈ اسماعیل چوہدری مال روڈ پہنچے اور اُنہوں نے طلباء کے تحفظات دور کرنے کی یقین دہانی کرائی۔

طلباء کے مطالبات کے بعد لاہور بورڈ نے پرچوں کی ری چیکنگ کی تاریخ 25 اکتوبر تک بڑھا دی ہے اور اس دوران طلباء سادہ صفحے پر درخواست جمع کراسکتے ہیں۔جس کے بعد متاثرہ طلباء کو ان کے پرچوں کی جوابی کاپیاں دکھائی جائیں گی۔

بورڈ حکام نے طلباء کو ہدایات جاری کی ہیں کہ وہ پرچوں کی چیکنگ کے لیے کسی قسم کی فیس جمع نہ کرائیں۔