درسگاہوں میں ڈرگ بیچنے والے گرفتار افراد سے 6 کلو منشیات برآمد
- August 26, 2017 5:08 pm PST
![taleemizavia single page](https://taleemizavia.com.pk/wp-content/uploads/2017/08/drugs.jpg)
اسلام آباد
تعلیمی اداروں میں منشیات فراہم کرنیوالے عناصر کے خلاف انسداد منشیات فورس کی مہم کے دوران اب تک ایک خاتون سمیت 20 منشیات فراہمی میں ملوث عناصر کو گرفتار کیا گیا ہے۔
اور 6.4 کلو گرام منشیات قبضے میں لی گئی ہیں جس کی بین الاقوامی مالیت 70 لاکھ روپے ہے، جس میں سوا چھ کلو گرام چرس اور 26 گرام آئس شامل ہے۔
اینٹی نارکوٹیکس فورس راولپنڈی نے گلزار قائد، راولپنڈی میں واقع جوڈیشل کالونی کے قریب ایک موٹرسائیکل روک کر اس پر سوار راولپنڈی کے رہائشی 3 ملزمان محمد شہباز، نوید اقبال اور راجہ محمد داور کے قبضے سے 450 گرام چرس برآمد کر کے تینوں ملزمان کو گرفتار کر لیا۔
ابتدائی اطلاعات کے مطابق ملزمان کیپیٹل یونیورسٹی آف سائنس اینڈ ٹیکنالوجی اور روٹس سکول سسٹم کے طلباء کو منشیات فراہم کرنے میں ملوث تھے۔
ایک اور کارروائی کے دوران اے این ایف راولپنڈی نے اٹک بسال روڈ، اٹک پر واقع چووّن میل چوک کے قریب نصیر خان نامی موٹرسائیکل سوار مقامی منشیات فروش کے قبضے سے 250 گرام چرس برآمد کر کے اسے گرفتار کر لیا۔ابتدائی اطلاعات کے مطابق ملزم مختلف سکولوں اور کالجوں میں طلباء کو منشیات فراہم کرتا تھا۔