لاہور

پاکستان ایجوکیشن کونسل کی جانب سے جاری بیان میں اعلان کیا گیا ہے کہ پاکستان سپُر لیگ کے فائنل میچ اور لاہور کی سیکورٹی صورتحال کے پیش نظر شہر کے بڑے تعلیمی ادارے آئندہ دو روز کیلئے بند ہوں گے۔

لاہور میں بیکن ہاؤس، لاہور گرائمر سکول، امریکن لائسٹیف، لاکاس، ایجوکیٹرز، الائیڈ سکولز کی تمام برانچر بروز جمعہ اور ہفتہ بند ہوں گی اور سیکورٹی وجوہات کی بناء پر اس فیصلے سے متعلق والدین کو بھی آگاہ کر دیا گیا ہے۔

پنجاب حکومت اور لاہور کی ضلعی انتظامیہ نے تاحال سرکاری سکولوں میں چھٹی کا اعلان نہیں کیا۔

قذافی اسٹیڈیم لاہور میں ہونے والے میچ کے باعث گلبرگ کے گرد و نواح کے علاقوں میں تین روز سے سرچ آپریشن جاری ہے اور سیکورٹی کے انتہائی سخت انتظامات کیے گئے ہیں۔

مذکورہ سکولز کی انتظامیہ نے سوشل میڈیا اور اپنی آفیشل ویب سائٹ پر بھی سکول بند ہونے کا نوٹیفکیشن جاری کر دیا ہے۔