پشاور

تنظیم اساتذہ خیبر پختونخوانے پرائمری سطح پر مخلوط نظام تعلیم اور پرائمری سکولوں میں خالی آسامیوں پر خواتین اساتذہ کو بھرتی کرنے کے فیصلے کو صو بے کے مذہبی رجحانات کے خلاف اور اعلیٰ تعلیم یافتہ نوجوانوں کے حقوق پر ڈاکہ ڈالنے کے مترادف قرار دیا ہے۔

تنظیم اساتذہ نے حکومت کے خلاف سولہ اکتوبر سے پختونخوا میں پاکستان تحریک انصاف کی حکومت کے خلاف احتجاجی مظاہروں کا اعلان کیا ہے اور یہ مظاہرے صوبے بھر میں بائیس اکتوبر تک جاری رہیں گے۔

یہ اعلان تنظیم اساتذہ پختونخوا چیپٹر کے زیر اہتمام منعقدہ اجلاس میں کیا گیا جس کی صدارت خیر اللہ حواری نے کی۔

اجلاس میں ڈاکٹر محمد ناصر عبید اللہ، شمشاد خان جھگڑا، میاں ضیاء الرحمن کے علاوہ تنظیم اساتذہ کے دیگر عہدیداروں نے بھی شرکت کی۔

خیر اللہ حواری کہتے ہیں کہ وہ خواتین کی تقرریوں کے خلاف نہیں ہیں تاہم خواتین کی تقرریاں صرف لڑکیوں کے پرائمری سکولوں میں کی جائیں اور جب تک حکومت اس پالیسی کو تبدیل نہیں کرے گی وہ اپنا احتجاج جاری رکھیں گے۔

واضح رہے کہ تنظیم اساتذہ پاکستان جماعت اسلامی کے نظریات کی حامل جماعت ہے جس میں کالجوں کے اساتذہ شامل ہیں۔