راولپنڈی

حکومت پنجاب نے صوبے کے چونتیس اضلاع میں سے 17 اضلاع کی ڈسٹرکٹ ایجوکیشن اتھارٹیز کے چیف ایگزیکٹو آفیسرز کو ہدایات جاری کی ہیں کہ بھٹہ مزدوروں کے بچوں کو فوری طور پر نئے خدمت کارڈز کا اجراء کیا جائے جو بچے سکولوں میں زیر تعلیم ہیں۔

وزیر اعلیٰ مانیٹرنگ فورس محکمہ سکولز ایجوکیشن پنجاب کی جانب سے اتھارٹیز کے سربراہان کو مراسلہ لکھا گیا ہے۔

خدمت کارڈز میں بھٹہ مزدور کے بچوں کو ایک ہزار روپے ماہانہ وظیفہ دیا جارہا ہے اور ان طلباء کو سکولوں میں مفت تعلیم فراہم کی جا رہی ہے۔

خدمت کارڈز بہاولپور، بھکر، چکوال، ڈیرہ غازی خان، فیصل آباد، گجرانوالہ، گجرات، خانیوال، لاہور، منڈی بہاؤ الدین، مظفر گڑھ، ملتان، راولپنڈی، رحیم یار خان، ساہیوال، سرگودھا اور سیالکوٹ کے اضلاع کے طلباء میں تقسیم کیے جائیں گے۔

محکمہ نے اتھارٹی کے سربراہان کو ہدایات جاری کی ہیں کہ ڈسٹرکٹ کی سطح پر خدمت کارڈز کی تقسیم کے لیے فوکل پرسن بنا دیے گئے ہیں اور ان فوکل پرسن کے ذریعے سے اس تقسیم کے عمل کو فوری طور پر مکمل کیا جائے۔