کراچی

سندھ حکومت کی جانب سے صوبے بھر میں تعلیمی ایمرجنسی ، آسٹریلیا سے بیورو کریٹ بلاکر سیکرٹری اسکولز لگانے، محکمہ تعلیم کو دو حصوں میں تقسیم اور اساتذہ پر بائیومیٹرک کا نظام مسلط کرنے کے باوجود سندھ میں سرکاری اسکولوں کی صورتحال میں تبدیلی نہ آسکی۔

اقوام متحدہ کے ادارے یونیسیف کی جانب سے سندھ میں تعلیمی صورتحال پر جاری کردہ رپورٹ میں حکومتی دعوئوں کی قلعی کھل گئی اور تمام دعوئوں کا بھانڈا پھوٹ گیا۔

رپورٹ کے مطابق محکمہ تعلیم کے 200ارب سے زائد کے بجٹ کے باوجود سندھ میں تعلیمی ادارے بہتر کارکردگی نہ دکھا سکے اور ادارے بہتری کی بجائے زبوں حالی کا شکار ہیں۔

صوبے کے 50فیصد سرکاری اسکولوں میں پینے کا صاف پانی اور بیت الخلا موجود نہیں۔

رپورٹ میں مزید بتایا گیا ہے کہ صوبے کے 50فیصد لڑکے اور 47فیصد لڑکیاں پرائمری اسکول میں بیت الخلاء سے محروم ہیں جبکہ 53فیصد لڑکے اور54 فیصد لڑکیاں پرائمری اسکولوں میں پینے کے صاف پانی کی سہولت سے بھی محروم ہیں۔

رپورٹ کے مطابق سندھ کے مڈل اسکولوں میں بھی 30فیصد لڑکے اور 29فیصد لڑکیاں بیت الخلاء کی سہولت سے محروم اور 40فیصد لڑکے اور 39فیصد لڑکیاں اسکول بھی پانی سے محروم ہیں۔

اس حوالے سے جب سندھ کے وزیرتعلیم جام مہتاب حسین ڈہر سے موقف لینے کیلئے رابطہ کیا گیا تو ان کا موبائل فون بند تھا، پیغام ارسال کرنے کے باوجود جواب نہیں دیا گیا۔ واضح رہے کہ حکومت سندھ نے رواں مالی سال کے بجٹ میں وسائل کا سب سے زیادہ حصہ 202ارب روپے تعلیم کے شعبے کے لئے مختص کیا ہے۔