کراچی

طلباء حقوق مہم میں سرکاری جامعات میں بھی زیادہ فیس، تعلیمی اداروں سے کرپشن کا خاتمہ، یکساں نظام تعلیم اور طلباء یونین کی بحالی شامل ہوں گی۔

اسلامی جمعیت طلباءاس مہم کے دوران ملک گیر احتجاجی مظاہرے، کالجوں اور یونیورسٹیوں میں کانفرنسز کرائے گی اسلامی جمعیت طلباء پاکستان کے جنرل سیکرٹری فیصل جاوید اس مہم کی براہ راست نگرانی کریں گے۔

فیصل جاوید کے مطابق پاکستان میں بڑھتی مہنگائی اور بے روزگاری کا براہ راست اثر نئی نسل پر مہنگی تعلیم کی صورت میں مرتب ہورہا ہے اور اس پر حزب اقتدار کی جماعتیں خاموش ہیں۔

فیصل جاوید کہتے ہیں کہ حزب اقتدار اور حزب اختلاف کی جماعتوں کا گٹھ جوڑ ہے، پانامہ کے معاملے پر ہنگامہ آرائی، میٹرو بس اور اورنج ٹرین جیسے ایشوز میں عوام کو اُلجھایا جارہا ہے جبکہ تعلیم کے معاملے پر خاموش ناقابل فہم ہے۔

فیصل جاوید نے اسلامی جمعیت طلباء پاکستان کے سیکرٹریٹ میں عہدیداروں کے منعقدہ اجلاس کی صدارت کرتے ہوئے ان خیالات کا اظہار کیا ہے۔

طلباء حقوق مہم پر فیصل جاوید کہتے ہیں کہ 18 ویں ترمیم کے بعد صوبوں میں نصاب تعلیم کے نئے طبقات وجود میں آگئے ہیں۔

ہر سال نظریات امور سے متعلقہ اسباق کو تبدیل کیا جارہا ہے اور طبقاتی تعلیم نے قوم میں اتحاد و یگانگت کی جڑوں کو کھوکھلا کر دیا ہے۔

اس مہم میں یکساں نصاب تعلیم نافذ کرنے پر خصوصی توجہ دی جائے گی۔

فیصل جاوید کہتے ہی کہ انگریزی زبان کو مکمل ذریعہ تعلیم بنانے سے رٹا کلچر کو فروغ مل رہا ہے جبکہ یونیورسٹیوں کی سطح پر بیرونی دنیا کے پرانے اسباق پڑھائے جا رہے ہیں۔

فیصل جاوید کا کہنا ہے کہ مغرب کی آزاد تہذیب اس ملک کا مقدر نہیں بن سکتی۔ پاکستان میں مذہبی انتہاپسندی اور آزاد خیالی کی انتہا پسندی سے عوام کا نقصان ہورہا ہے۔

فیصل جاوید کا ماننا ہے کہ ملک کے ایلیٹ کلاس تعلیمی ادارے ملٹی نیشنل کمپنیوں اور بیرون ملک خدمات دینے والے پاکستانی تیار کر رہے ہیں جس کا ملکی معیشت کو کسی بھی طرح کا فائدہ نہیں ہو رہا۔ تعلیمی ادارے امن اور ترقی کی علامت ہوتے ہیں مگر نئی نسل کے پاس کوئی بامقصد لائحہ عمل نہ ہونے کی وجہ سے براہ راست ملکی ترقی میں کردار کی ادائیگی کا کوئی منصوبہ نہیں۔

اسلامی جمعیت طلباء جلد ہی اس مہم کے حوالے سے پروگرام کا انعقاد کرے گی۔