رحیم یار خان

محکمہ سکولز ایجوکیشن پنجاب کے سیکرٹری ڈاکٹر اللہ بخش ملک کی جانب سے سکولوں کے سربراہان کو حکم نامہ موصول ہوا کہ وہ صبح سکول اوقات کے دوران مین گیٹ پر کھڑے ہو کر طلباء کو خوش آمدید کریں گے اور جب تک آخری طالبعلم سکول میں داخل نہ ہو جائے وہ گیٹ پر ہی کھڑے رہیں گے۔

سیکرٹری کی جانب سے یہ بھی ہدایات جاری کی گئی ہیں کہ چھٹی کے بعد بھی ہیڈ ماسٹرز سکول گیٹ پر کھڑے ہو کر طلباء کو خدا حافظ کریں گے اور تمام کلاس رومز میں جا کر چیکنگ کریں گے کہ کوئی طالبعلم چھٹی کے بعد سکول میں رہ تو نہیں گیا۔

ہیڈ ماسٹرز کو یہ بھی حکم ہوا ہے کہ وہ بچوں سے سکول میں صفائی کا کام نہیں لیں گے اور درجہ چہارم کے ملازم کو یہ کام سونپا جائے۔ اگر ملازم موجود نہیں ہے تو ہیڈ ماسٹر سکول فنڈ سے پرائیویٹ ملازم تعینات کر سکتے ہیں۔

ہیڈ ماسٹرز کو ہدایات جاری کی گئی ہیں کہ کلاس رومز میں اساتذہ کو موبائل فون استعمال کرنے کی ہرگز اجازت نہ دی جائے اگر کوئی اُستاد موبائل فون استعمال کرتے ہوئے پکڑا گیا تو سخت کارروائی عمل میں لائی جائے گی۔

سیکرٹری سکولز پنجاب ڈاکٹر اللہ بخش ملک نے ایجوکیشن اتھارٹیز کے سربراہان کو ان ہدایات پر سختی سے عمل درآمد کرنے کا حکم جاری کیا ہے۔