رحیم یار خان

پنجاب حکومت نے سرکاری کالجوں کے اساتذہ کی پرفارمنس کی جانچ پڑتال کیلئے نئی پالیسی کا نفاذ کر دیا ہے اور اس ضمن میں کالجز پرنسپل کے نام مراسلہ جاری کیا گیا ہے۔

محکمہ ہائر ایجوکیشن پنجاب نے انٹرمیڈیٹ اور گریجویشن کے طلباء کے سالانہ امتحانات سے پہلے کالج میں ہونے والے ٹیسٹ کے نتائج ڈائریکٹوریٹ پبلک انسٹرکشنز کو بھیجنے کا پاپند بنایا گیا ہے۔ مراسلے میں ہدایات کی گئی ہیں تعلیمی بورڈز کے امتحانات سے ایک مہینہ قبل کالج ٹیسٹ کے نتائج محکمہ کو ارسال کیے جائیں۔

کالج پرنسپل اس بات کے پاپند بنا دیے گئے ہیں کہ وہ ہر مضمون کے نتائج متعلقہ اُستاد کے نام کے ساتھ ڈی پی آئی کالجز پنجاب کو ارسال کریں گے جبکہ بی اے کی سطح کا کالج ٹیسٹ یونیورسٹی امتحان سے ایک مہینہ قبل لیے جائیں گے۔

مراسلے میں واضح طور پر کہا گیا ہے کہ کالج میں لیے گئے امتحانات کے نتائج کا بورڈ اور یونیورسٹی امتحان کے نتائج کے ساتھ موازنہ کیا جائے گا اور اس بنیاد پر اساتذہ کی پرفارمنس کو پرکھا جائے گا۔ محکمہ نے پرنسپل کو حکم جاری کیا ہے کہ سالانہ امتحانات تک کالج تدریسی سرگرمیوں کے لیے کھلے رہیں گے۔

اس سے قبل کالج میں لیے گئے ٹیسٹ کے نتائج لازمی طور پر ڈی پی آئی کالجز کو جمع نہیں کرائے جاتے تھے۔ واضح رہے کہ پنجاب کے 720 کالجوں کے نتائج محکمہ میں جمع کیے جائیں گے۔