راولپنڈی

پنجاب پبلک سروس کمیشن کے تحت سرکاری کالجوں میں لیکچررز کی بھرتیوں کے لیے سوالیہ پرچہ بھارتی ویب سائٹ سے لینے کا انکشاف ہوا ہے۔ پنجاب پبلک سروس کمیشن کے تحت کمپیوٹر سائنس میں لیکچررز کیلئے تحریری امتحان کا پورا سوالیہ پرچہ بھارتی ویب سائٹ سے اُٹھا کر دے دیا گیا۔

پنجاب پبلک سروس کمیشن کے تحت سرکاری کالجوں میں اساتذہ کی بھرتیاں کی جارہی ہیں کمپیوٹر سائنس کے مضمون میں لیکچررز کی بھرتیوں کے لیے کمیشن کے تحت لیے گئے اس تحریری امتحان کے تمام سوالات بھارتی ویب سائٹ سے اُٹھائے گئے ہیں۔

اور یہ سوالات بھارتی ویب سائٹ سان فاؤنڈری پر کمپیوٹر سائنس اور انجینئرنگ کے مضامین کے معروضی سوالات کا ڈیٹا بنک موجود ہے جو بنیادی طور پر طلباء کی رہنمائی کیلئے ہے۔

تاہم اس ویب سائٹ پر موجود سوالات کمیشن کے امتحان میں دے دیے گئے۔

کمپیوٹر سائنس کے لیکچررز کی اسامیوں کے اُمیدواروں نے کمیشن کے چیئرمین سے اس معاملے کی انکوائری کا مطالبہ کیا ہے۔

کمپیوٹر سائنس کا تحریری امتحان دینے والے اُمیدواروں کا کہنا ہے کہ بھارتی ویب سائٹ سے سوالات اُٹھا کر پرچہ تیار کرنے کے ساتھ ساتھ اس پرچے کو مخصوص اُمیدواروں کو بھی دیا گیا تاکہ وہ امتحان امتیازی نمبروں سے پاس کرسکیں۔

اُمیدواروں نے الزام عائد کیا ہے کہ سوالیہ پرچہ ایک روز پہلے ہی واٹس ایپ پر گردش کرتا رہا، بھارتی ویب سائٹ سے سوالات لینے اور پھر پرچہ لیک ہونا کمیشن کی مجرمانہ غفلت ہے جس کی بڑے پیمانے پر انکوائری کی جانی چاہیے۔

پنجاب پبلک سروس کمیشن نے کمپیوٹر سائنس کے تحریری امتحان کے معاملے پر خاموش ہے۔