لاہور

راوینز یونائیٹڈ کے قاضی آفاق حسین اولڈ راوین یونین کے الیکشن میں چار سو سینتیس ووٹ لے کر صدر منتخب ہوگئے ہیں۔ ان کے مد مقابل اُمیدوار میاں محمد اشفاق موہلن نے تین سو پچاس، قاری زرغام الحق نے دو سو نو ووٹ حاصل کیے۔

گورنمنٹ کالج یونیورسٹی لاہور میں اولڈ راوین یونین کے انتخابات میں پولنگ کا وقت صبح نو بجے شروع ہوا جو شام چار بجے تک جاری رہا۔ الیکشن میں تین گروپس نے حصہ لیا۔ جس میں راوین ساگا، راوین کلب اور راوین یونائیٹڈ شامل ہیں۔

الیکشن میں راوینز یونائیٹڈ کے اسجد غنی طاہر تین سو چوون ووٹ لے کر نائب صدر منتخب ہوئے ہیں ان کے مد مقابل اُمیدوار امانت علی غالب نے ستائیس ووٹ، میاں محمد احمد چاچڑ نے دو سو بانوے اور محمد اسلم بھٹی نے تین سو تیرہ ووٹ حاصل کیے ہیں۔

راوینز یونائٹیڈ کی ڈاکٹر شیبہ عالم پانچ سو اٹھانوے ووٹ لے کر نائب صدر منتخب ہوگئی ہیں ان کے مد مقابل اُمیدوار نغمہ سائرہ نے تین سو چوون ووٹ حاصل کیے۔

جنرل سیکرٹری کی سیٹ پر رانا اسد اللہ خان چار سو سٹرسٹھ ووٹ لے کر کامیاب ہوئے ہیں جبکہ مد مقابل اُمیدوار الطاف احمد نے دو سو اکیاسی اور طیب حسین رضوی نے دو سو چھیالیس ووٹ حاصل کیے۔

راوینز یونائیٹڈ کے ڈاکٹر سلیم حیدر کاظمی تین سو نوے ووٹ لے کر خزانچی منتخب ہوگئے ہیں جبکہ مقابلے پر اُمیدوار ہمایوں مسعود خان نے تین سو پندرہ اور محمد محسن امین نے دو سو اکانوے ووٹ حاصل کیے۔

اولڈ راوین یونین کے الیکشن میں ایگزیکٹو سیٹوں پر بھی راوینز یونائیٹڈ نے کلین سویپ کیا۔ انوار الحق پچپن، فرخ حیات پنوں ایک سو اکہتر، عثمان سعید ایک سو گیارہ اور ڈاکٹر عبد الباسط ایک سو اڑسٹھ ووٹ لے کر کامیاب ہوئے ہیں۔

اولڈ راوین یونین انتخابات میں صدر، جنرل سیکرٹری، نائب صدور اور خزانچی کے عہدوں پر مجموعی طور پر ایک ہزار چھ ووٹ کاسٹ ہوئےجبکہ ایک سو چھ ووٹ مختلف وجوہات کی بناء پر مسترد ہوئے۔

اولڈ راوین یونین کے نئے صدر قاضی آفاق حسین نے تعلیمی زاویہ سے بات کرتے ہوئے کہا کہ راوین کے اعتماد اور سپورٹ پر وہ اُن کے انتہائی ممنون ہیں۔ اُن کا کہنا تھا کہ گورنمنٹ کالج یونیورسٹی کی روایات اور اس عظیم درسگاہ کی عظمت کے لیے وہ کام کرتے رہیں گے۔