رپورٹ اسلام آباد

پاکستان کے نامور نجی تعلیمی ادارے لاہور گرائمر سکول کی جانب سے اپنے طلباء کو یورپ بھیجنے کے لیے مبینہ طور پر جعلسازی کرنے کا انکشاف ہوا ہے اور اس ضمن میں اسلام آباد میں واقع جرمن سفارتخانے نے سخت کارروائی کی ہے۔

تفصیلات کے مطابق لاہور گرائمر سکول نے اپنی مختلف برانچوں میں زیر تعلیم سینئر کلاسز کے طلباء کو یورپ کے مختلف ممالک میں دورے پر بھیجنے کے لیے غیر ملکی سفارتخانوں میں دستاویزات جمع کرائیں تاہم ان دستاویزات میں مبینہ طور پر جعلسازی کی گئی ہے۔

لاہور گرائمر سکول نے یورپ میں سٹوڈنٹس ایکسچینج پروگرام کے تحت نجی کمپنی کنیٹنگ کلچرز کے ذریعے سے جرمن سفارتخانے میں ویزا سیکشن میں ہاٹلز کی جعلی بکنگ اور دیگر جعلی دستاویزات جمع کرائیں جس پر سفارتخانے کی جانب سے سخت کارروائی عمل میں لائی گئی ہے۔

لاہور گرائمر سکول نے اپنے 95 طلباء کو یورپ بھیجنے کے لیے ویزا درخواستیں جمع کرائی تھیں۔

جرمن سفارتخانے نے کنیٹکنگ کلچرز نامی نجی کمپنی کو بلیک لسٹ کر دیا ہے اور حکومت پاکستان کو اس کمپنی اور لاہور گرائمر سکول کے خلاف کارروائی کرنے کی سفارشات کی ہیں۔

اسلام آباد میں تعینات جرمن سفارتگار مارٹن کوبلر نے اس ضمن میں اپنے ٹوئٹر اکاؤنٹ سے الرٹ پر مبنی ٹویٹس کیے ہیں۔ مارٹن کوبلر نے خبردار کیا ہے کہ جعلسازی کی بنیاد پر یورپ داخل ہونے سے بچا جائے۔ اُنہوں نے کہا کہ لاہور گرائمر سکول کے خلاف کارروائی بھی کی جائے گی۔