اسلام آباد

فیڈرل بورڈ آف انٹرمیڈیٹ اینڈ سیکنڈری ایجوکیشن اسلام آباد نے پرچوں کی مارکنگ کے نظام کو بہتر کرنے کے لیے فیسوں میں اضافہ کر دیا ہے۔ پرچے چیک کرنے والے اساتذہ کو فی پرچہ پر اب 48 روپے معاوضہ دیا جائے گا جبکہ اس سے پہلے یہ معاوضہ 22 روپے مقرر تھا۔

بورڈ نے امتحانی نظام میں پرچوں کی چیکنگ کو مزید اپ ڈیٹ کرنے کے لیے اساتذہ کی تربیتی ورکشاپ کرانے کا بھی فیصلہ کیا ہے اور یہ ورکشاپ سالانہ بنیادوں پر ہوں گی جس میں بورڈ سے منسلک وہ اساتذہ جو پرچوں کی چیکنگ کرتے ہیں شرکت کریں گے۔

بورڈ حکام کے مطابق امتحانات کے اس اصلاحاتی پروگرام پر مجموعی طور پر سالانہ چالیس کروڑ روپے خرچ کیے جارہے ہیں۔

اساتذہ کی تربیتی ورکشاپ میں پرچوں کی چیکنگ بھی کرائی جائے گی جس کا مقصد اساتذہ کی استعداد کاری کا جائزہ لینا ہے اور انہیں پرچوں کی چیکنگ میں مزید بہتری کی طرف لے کر جانا ہے۔

بورڈ کی جانب سے سرکاری سکولز اور کالجوں کے اساتذہ کو ہدایات جاری کی گئی ہیں کہ وہ پرچوں کی مارکنگ کے نئے سسٹم سے وابستہ ہونے کے لیے اپنی درخواستیں بورڈ کو جمع کرا دیں تاکہ انہیں شارٹ لسٹ کرنے کے بعد ٹریننگ شیڈول میں شامل کیا جاسکے۔

بورڈ نے اس ضمن میں یہ بھی فیصلہ کیا ہے کہ نجی تعلیمی اداروں کے اساتذہ کو بھی ٹریننگ ورکشاپ میں شامل کیا جائے تاکہ ان اساتذہ کو بھی پرچوں کی چیکنگ میں تعینات کیا جاسکے۔

بورڈ نے شرط عائد کی ہے کہ صرف اُن اساتذہ کو پرچوں کی چیکنگ کی ڈیوٹیز پر تعینات کیا جائے جن کی سفارشات متعلقہ کالج کے پرنسپلز کے تصدیقی سرٹیفیکٹ اور اساتذہ کی مطلوبہ تعلیمی اہلیت پوری ہوگی۔