لاہور

فاطمہ جناح میڈیکل کالج لاہور کی طالبات اپنی ڈگریوں کے غیر تصدیق شدہ ہونے کے خلاف احتجاجی مظاہرہ کیا ہے۔ طالبات نے اپنی کلاسز کا بائیکاٹ کر کے کنگا رام ہسپتال کے سامنے مظاہرہ کیا ہے۔

احتجاج میں شریک طالبات کا موقف ہے کہ کالج کو 2015ء میں یونیورسٹی کا درجہ دیا گیا تھا تاہم پاکستان میڈیکل اینڈ ڈینٹل کونسل نے اس تاریخی ادارے کو یونیورسٹی تسلیم کرنے سے انکار کر دیا ہے۔

کالج کو یونیورسٹی نہ ماننے پر پی ایم ڈی سی نے اس کی ڈگریوں کی تصدیق کرنے سے بھی انکار کر دیا ہے جس پر فاطمہ جناح کالج (یونیورسٹی) کی طالبات کا مستقبل داؤ پر لگ گیا ہے۔

احتجاجی طالبات کا کہنا ہے کہ اُنہوں نے سخت مقابلے اور محنت کے بعد پہلے یہاں داخلہ لیا جس کے بعد ڈگری مکمل کی اور اب ان کی ڈگریوں کو تسلیم نہیں کیا جارہا ہے، پاکستان میڈیکل اینڈ ڈینٹل کونسل جب تک اُن کی ڈگریوں کو تسلیم نہیں کرتا اُس وقت تک وہ اپنا احتجاج جاری رکھیں گی۔

احتجاجی طالبات سے مذاکرات کے لیے فاطمہ جناح میڈیکل کالج کے پرو وائس چانسلر ڈاکٹر عامر زمان نے بات چیت کی کوشش بھی کی تاہم طالبات اپنے مطالبات سے پیچھے نہیں ہٹ رہیں۔

کالج کی طالبہ ماہین فاطمہ کہتی ہیں کہ لاہور کے نامور ادارے سے ڈگری مکمل کرنے کے بعد اُن کی ڈگری تسلیم نہیں کی جارہی تو پھر وہ اب کہاں جائیں؟ کیا محکمہ ہیلتھ ان کے مستقبل کو تباہ کرنا چاہتا ہے؟

یہ بھی پڑھیں؛ پی ایم ڈی سی کا فاطمہ جناح میڈیکل یونیورسٹی کو تسلیم کرنے سے انکار

ماہین فاطمہ کہتی ہیں کہ یہ حکومت کی ذمہ داری ہے کہ وہ پی ایم ڈی سی کے ساتھ بات چیت کرے۔

فاطمہ جناح میڈیکل کالج کی ان احتجاجی طالبات نے اعلان کیا ہے کہ جب تک ان کی ڈگریوں کو منظور کرنے کا نوٹیفکیشن جاری نہیں کیا جاتا اُس وقت تک وہ احتجاج کرتی رہیں گی۔