اسلام آباد

پاکستان میڈیکل ایںڈ ڈینٹل کونسل نے فاطمہ جناح میڈیکل کالج کو بطور یونیورسٹی فرسٹ شیڈول لسٹ میں شامل کر لیا ہے اب اس کالج کو یونیورسٹی بنانے کی راہ ہموار ہوگئی ہے۔ پی ایم ڈی سی کی جانب سے اس ضمن میں مراسلہ بھی جاری کر دیا گیا ہے۔

ڈائریکٹر ریگولیشن پی ایم ڈی سی ڈاکٹر ارشد کریم چانڈیو کی جانب سے جاری کیے گئے مراسلے کے مطابق فاطمہ جناح میڈیکل یونیورسٹی لاہور کا نام آرڈیننس کے شیڈول میں شامل کر لیا گیا ہے۔ اب یونیورسٹی میں بیچلر آف میڈیسن اینڈ بیچلر آف سرجری ایم بی بی ایس کی ڈگریوں کی اجازت دے دی گئی ہے۔

پاکستان میڈیکل اینڈ ڈینٹل کونسل نے یہ مراسلہ آج لاہور ہائیکورٹ میں بھی جمع کرا دیا ہے۔ واضح رہے کہ لاہور ہائیکورٹ میں فاطمہ جناح میڈیکل کالج کی ڈگریوں کی تصدیق کے معاملے کا کیس دائر ہے جس پر آج سماعت کی جارہی ہے۔

ہائر ایجوکیشن کمیشن اور پی ایم ڈی سی کی جانب سے ڈگریوں کو تسلیم نہ کرنے کے معاملے پر فاطمہ جناح میڈیکل کالج کی طالبات لاہور میں متعدد بار احتجاجی مظاہرے بھی کر چکی ہیں۔