مانیٹرنگ ڈیسک

لاہور ہائیکورٹ نے دو ہزار اٹھارہ سے سی ایس ایس امتحان اُردو زبان میں لینے کا حکم جاری کیا ہے۔

تفصیلات کے مطابق ایڈوکیٹ سیف الرحمن کی درخواست پر عدالت نے یہ فیصلہ جاری کیا ہے۔ جسٹس عاتر محمود نے اپنے فیصلہ میں کہا ہے کہ سپریم کورٹ کے فیصلے کی روشنی میں فیڈرل پبلک سروس کمیشن دو ہزار اٹھارہ میں اُردو زبان میں امتحان لے۔

عدالت نے اپنے ریمارکس میں کہا ہے کہ انتظامی مسائل اور وقت کم ہونے کی بناء پر رواں سال اُردو زبان میں امتحانات منعقد نہیں ہو سکتے تاہم آئندہ سال سے یہ امتحان لازمی طور پر اُردو زبان میں لیا جائے ۔

سپریم کورٹ نے دو ہزار پندرہ میں اپنے فیصلے میں حکومت کو حکم جاری کیا تھا کہ تمام سرکاری اداروں میں اُردو زبان کا نفاذ کیا جائے اور اُردو زبان کو ہی بطور سرکاری زبان رائج کیا جائے ۔

یہ فیصلہ سابق چیف جسٹس جواد ایس خواجہ کی سربراہی میں تین رُکنی بینچ نے آئین پاکستان کی روشنی میں اُردو زبان کے نفاذ کا فیصلہ سُںایا تھا۔