راولپنڈی

محکمہ ہائر ایجوکیشن پنجاب نے صوبے کے سرکاری کالجز کے اساتذہ پر پاپندی عائد کر دی ہے کہ وہ اپریل دو ہزار اٹھارہ تک استحقاقی چھٹیاں نہیں لے سکتی۔ اس ضمن میں ڈائریکٹوریٹ پبلک انسٹرکشنز کالجز پنجاب کے نام مراسلہ بھی جاری کر دیا گیا ہے۔

مراسلے میں کہا گیا ہے کہ کالجوں کے اساتذہ ایمرجنسی نوعیت کی چھٹی کے علاوہ دیگر تمام چھٹیاں لینے کے مجاز نہیں ہوں گے اور ایمرجنسی نوعیت کی چھٹی کی منظوری بھی باقاعدہ طور پر اتھارٹی سے لینا ضروری ہوگی۔ محکمہ نے استحقاقی چھٹی، شارٹ لیو، ڈیوٹی لیو پر پاپندی عائد کر دی ہے۔ مراسلے کے مطابق اساتذہ اپنے ذاتی کام کیلئے سیکرٹیریٹ جانا چاہتے ہیں تو اس کی چھٹی بھی ایک بجے کے بعد لی جاسکتی ہے۔

مراسلے میں کہا گیا ہے کہ کالجوں کے پرنسپل کالج اوقات کے دوران اساتذہ کی حاضری کو یقینی بنائیں جبکہ پرنسپل پر بھی پاپندی عائد کر دی گئی ہے کہ وہ صبح آٹھ بجے کالج حاضر ہوں اور اساتذہ کی حاضری رپورٹ نو بجے سے پہلے متعلقہ ضلع کے ڈائریکٹر کالجز کو ارسال کی جائے۔

یہ سخت فیصلہ اُس وقت کیا گیا جب محکمہ کی انسپکشن ٹیم نے لاہور کے سات بڑے سرکاری کالجوں کا ہنگامی دورہ کیا اور وہاں پر متعدد اساتذہ غیر حاضر پائے گئے اور کلاسز نہ ہونے پر محکمہ کی جانب سے سخت نوٹس بھی لیا گیا۔

محکمہ ہائر ایجوکیشن نے ڈی پی آئی کالجز کو ہدایات جاری کی ہیں کہ وہ ڈائریکٹوریٹ کالجز کے ذریعے سے کالج پرنسپل کو اس پالیسی سے متعلق آگاہ کر دیں۔ اس مراسلے میں کالج ٹیچنگ انٹرنز کی چھٹیوں پر مکمل طور پر پاپندی عائد کر دی گئی ہے جبکہ سی ٹی آئی کی بھرتی پالیسی میں لکھا ہے کہ وہ ایک مہینے میں دو چھٹیاں کرنے کے مجاز ہوں گے۔

پنجاب پروفیسرز اینڈ لیکچررز ایسوسی ایشن نے کالج اساتذہ کی چھٹیوں پر پاپندی لگانے کے فیصلے پر سیکرٹری ہائر ایجوکیشن سے میٹنگ کرنے کا فیصلہ کیا ہے اور اس پالیسی کی سخت مذمت کی گئی ہے۔ ایسوسی ایشن کے عہدیدار سیکرٹری سے ملاقات کے بعد آئندہ کی حکمت عملی وضع کریں گے۔