ملتان

حکومت پنجاب نےسرکاری سکولز کے تین لاکھ سے زائد اساتذہ کے سکیل کو اپ گریڈ کرنے کا حتمی نوٹیفکیشن جاری کر دیا ہے جس کے تحت پرائمری، ایلیمنٹری اور سیکنڈری سکولز اساتذہ کا سکیل اپ گریڈ کیا گیا ہے۔

سرکاری سکولز اساتذہ کی ترقیوں کے بعد حکومت کو اب تنخواہوں کی مد میں تین ارب روپے کے بجٹ کا اضافہ کرنا ہوگا۔

محکمہ فنانس کی جانب سے وزیر اعلیٰ پنجاب کی حتمی منظوری کے بعد سرکاری سکولز کے اساتذہ کی سکیل اپ گریڈیشن کے نوٹیفکیشن کے مطابق پرائمری سکولز اساتذہ کی نوویں سکیل سے 14ویں سکیل میں اپ گریڈیشن کر دی گئی ہے۔

پنجاب کے ایلیمنٹری سکولز اساتذہ کی 14 ویں سکیل سے پندرہویں سکیل میں اپ گریڈیشن کر دی گئی ہے۔ سیکنڈری سکولز اساتذہ کی تنخواہوں پر دو انکریمنٹ لگانے کی بھی منظوری دے دی گئی ہے۔ محکمہ فنانس کے نوٹیفکیشن کے مطابق ایلیمنٹری سکولز میں پہلے سے ہی پندرہویں سکیل میں تعینات اساتذہ کی اپ گریڈیشن کر کے انہیں سولہویں سکیل میں ترقی دے دی گئی ہے۔

اساتذہ کے سکیل اپ گریڈیشن کا اطلاق یکم جنوری دو ہزار اٹھارہ سے ہوگا۔