ایشیاء کی 300 بہترین یونیورسٹیز میں پاکستان کی 10 یونیورسٹیز شامل

  • June 19, 2018 1:08 pm PST
taleemizavia single page

ویب ڈیسک

معیاری تعلیم کے حوالے سے یونیورسٹیوں کی درجہ بندی کو ہم گلوبل ولیج کے اس دور میں کسی طور نظر انداز نہیں کرسکتے ۔یہ موازنہ اس لحاظ سے بھی ہم پر لازم ٹھہرتا ہے کہ ہمیں اپنے معیارِ تعلیم کا اندازہ ہوسکے۔

کیو ایس نے ایشیا کی ٹاپ 300 یونیورسٹیوں کی درجہ بندی کی فہرست میں پاکستان کی 10 یونیورسٹیوں کو شامل کیا ہے، دریں اثناء دنیا کی بہترین یونیورسٹیوں کی تازہ ترین فہرست میں پاکستان کی چھ یونیورسٹیاں شامل ہیں۔

عالمی درجہ بندی کی بنیاد پر نیشنل یونیورسٹی آف سائنس اینڈ ٹیکنالوجی (نسٹ) کو ملک کی بہترین یونیورسٹی کا اعزاز حاصل ہوا ہے اور لاہور یونیورسٹی آف مینجمنٹ سائنسز اور قائد اعظم یونیورسٹی بالترتیب پاکستان کی دوسری اور تیسری بہترین یونیورسٹیاں ہیں۔

سالانہ رینکنگ میں اس برس تین نئی جامعات کو +700 بہترین یونیورسٹیوں کے گروپ میں شامل کیا گیا ہےجس میں یونیورسٹی آف کراچی، یونیورسٹی آف انجنیئرنگ اینڈ ٹیکنالوجی لاہور اور یونیورسٹی آف لاہور شامل ہیں۔

نیشنل یونیورسٹی آف سائنس اینڈ ٹیکنالوجی

ترقی پسند اور جدید نقطہ نظر کے ساتھ یہ پاکستان کی معروف یونیورسٹی ہے۔ جسے سائنس، تحقیق اور ترقی کے لیے جدید مرکز کے طور پر دیکھا جاتا ہے۔ اس یونیورسٹی کا قیام 1991ء میں ہوا۔ کیو ایس کی عالمی درجہ بندی میں یہ پاکستان کی ٹاپ رینکنگ یونیورسٹی ہے جو 501تا 550 بہترین یونیورسٹیوں کے گروپ میں شامل ہے۔ اسی طرح موضوعات کی بنیاد پر کیو ایس کی عالمی درجہ بندی میں یہ یونیورسٹی 250ویں نمبر پر ہے۔

لاہور یونیورسٹی آف مینجمنٹ سائنسز

پاکستان کی اس مشہور یونیورسٹی کو ناصرف پاکستان بلکہ ایشیائی خطے کی ٹاپ یونیورسٹیوں میں شامل کیا گیا ہے۔ 1984ء میں قائم ہونے والی یونیورسٹی ایک نجی تحقیقی یونیورسٹی ہے۔کیو ایس کی رینکنگ میں اسے +700 بہترین یونیورسٹیوں کے زمرے میں شامل کیا گیا ہے اس کے علاوہ 111 ویں پوزیشن کے ساتھ ایشیائی خطے کی ٹاپ یونیورسٹیوں میں شامل ہے۔

قائد اعظم یونیورسٹی

جسے اسلام آباد یونیورسٹی کے نام سے بھی جانا جاتا تھا ۔ یونیورسٹی 1967ء میں قائم ہوئی جس نے حال ہی میں اقوام متحدہ اور ٹوکیو یونیورسٹی سمیت مختلف تعلیمی اداروں کے ساتھ تعاون شروع کیا ۔کیو ایس رینکنگ میں اسے پاکستان کی بہترین جامعات میں سے ایک کہا گیا ہے جو کیو ایس ورلڈ رینکنگ 700+میں شامل ہے جبکہ ایشیائی رینکنگ 2015ء میں یہ 149 ویں نمبر پر تھی ۔

یونیورسٹی آف انجنیئرنگ اینڈ ٹیکنالوجی لاہور

کیو ایس ورلڈ رینکنگ میں پاکستان کی بہترین یونیورسٹیوں میں سے ایک ہے۔ نئی ورلڈ رینکنگ میں اسے +700 بہترین یونیورسٹیوں کے گروپ میں شامل کیا گیا ہے۔ اسے 1954ء میں کان کنی انجنیئرنگ میں بچلر ڈگری کی پیشکش کرنے والی پہلی یونیورسٹی کا اعزاز حاصل ہے ۔

کراچی یونیورسٹی

کراچی یونیورسٹی کو برصغیر اور تیسری دنیا میں تعلیم اور تحقیق کے میدان میں ایک اہم مرکز کی حیثیت حاصل ہےجس کے اساتذہ کی بڑی تعداد عالمی شناخت کی مالک ہے یہ اعلیٰ سطح کا تحقیقی مرکز ہونے کے علاوہ ملک کی بڑی یونیورسٹی ہے جہاں 800 ماہرین تعلیم 26 ہزار سے زائد طلبہ کو تعلیم دے رہے ہیں۔ نئی ورلڈ رینکنگ کے اعتبار سے یونیورسٹی + 700 بہترین یونیورسٹیوں کی درجہ بندی میں شامل ہے۔

یونیورسٹی آف لاہور

پاکستان کی یونیورسٹیوں میں ایک نئی یونیورسٹی ہے جہاں نجی شعبے میں تعلیم حاصل کرنے والے طلبہ کے لیے سیکھنے اور تحقیق کے کورسسز کا بڑا انتخاب موجود ہے اس کا قیام 1999ء میں ہوا کیو ایس کی عالمی درجہ بندی میں اسے +700 بہترین جامعات کے گروپ میں شامل کیا گیا ہے۔

دنیا کے معروف تعلیمی اداروں کی عالمی درجہ بندی

دنیا کی معروف رینکنگ ایجنسی کیو ایس کے مطابق ورلڈ رینکنگ میں ٹاپ پوزیشن حاصل کرنے والی امریکی میسا چوسٹس یونیورسٹی نے مسلسل پانچویں سال فہرست میں اپنی پہلی پوزیشن کو برقرار رکھا ہے۔

برطانیہ کے چار تعلیمی ادارے یونیورسٹی آف کیمبرج اور آکسفورڈ یونیورسٹی فہرست میں بالترتیب چوتھے اور چھٹے نمبر پر ہیں ۔یونیورسٹی کالج لندن اور ایمپریل کالج لندن عالمی درجہ بندی میں بالترتیب ساتویں اور نویں نمبر پر ہیں۔دس بہترین یونیورسٹیوں میں سوئس فیڈرل انسٹی ٹیوٹ آف ٹیکنالوجی آٹھویں نمبر پر اور شکاگو یونیورسٹی دسویں نمبر پر ہے۔

کیو ایس کی سالانہ رینکنگ میں تعلیمی اداروں کی چھ شعبوں جن میں تعلیمی ساکھ، اساتذہ کی ساکھ، فیکلٹی میں طلبہ کا تناسب، فیکلٹی فی اقتباسات، انٹرنیشنل فیکلٹی تناسب اور بین الاقوامی طالب علموں کا تناسب کے حوالے سے کارکردگی کا جائزہ لیا گیا ہے اور حاصل کردہ اسکور کے مطابق یونیورسٹیوں کی درجہ بندی کی گئی ہے۔

اس سال مجموعی طور پر دنیا کے 81 ممالک سے 3,800 تعلیمی اداروں کی کارکردگی کا جائزہ لینے کے بعد 916 یونیورسٹیوں کی عالمی درجہ بندی کی ہے جبکہ فہرست میں400بہترین یونیورسٹیوں کو انفرادی طور پر پوزیشن دی گئی جس کے بعد گروپ کی شکل میں جامعات کی درجہ بندی کی گئی۔


  1. This is not updated information as according to QS 2019 ranking 7 Ppakistani Universities are in the list of first 1000 QS ranked Universities

Leave a Reply

Your email address will not be published. Required fields are marked *