لاہور

پنجاب پبلک سروس کمیشن نے سرکاری کالجوں میں پروفیسرز کی بھرتیوں کے لیے اشتہار جاری کیا گیا تھا جو اب واپس لے لیا گیا ہے اور دوبارہ سے نیا اشتہار جاری کرنے کا فیصلہ ہوا ہے۔

کمیشن کی جانب سے پنجاب کے سرکاری کالجوں میں 73 پروفیسرز کی بھرتیاں کی جا رہی ہیں جس کے لیے اب نئے ضوابط طے ہوں گے۔

پہلے سے جاری اشتہار کے مطابق بارہ سالہ تدریسی تجربہ، متعلقہ مضمون میں پی ایچ ڈی کی ڈگری اور ہائر ایجوکیشن کمیشن کے تصدیق شدہ جرائد میں 6 تحقیقی مقالوں کی اشاعت کی شرط عائد کی تھی۔

اس اشتہار میں مرد اُمیدوار کے لیے عمر کی حد 53 سال جبکہ خاتون اُمیدوار کے لیے عمر کی حد 56 سال رکھی گئی تھی۔

پنجاب پبلک سروس کمیشن سرکاری کالجوں میں انگریزی، ریاضی، فزکس، کیمسٹری، اکنامکس، بائیولوجی، شماریات، زوالوجی، باٹنی، اُردو اسلامیات، سیاسیات، کامرس، ہسٹری، ایجوکیشن، عربی، سوشیالوجی، فارسی، جغرافیہ، پنجابی، سائیکالوجی، سوشل ورک اور ہوم اکنامکس کے مضامین میں پروفیسرز کی بھرتیاں کرے گا۔

جس میں 42 میل پروفیسرز اور 31 فی میل پروفیسرز شامل ہوں گی۔ ان بھرتیوں کا نیا ترمیم شدہ اشتہار جلد جاری کیا جائے گا۔