جنید احمد خان

تعلیمی میعار اور اعلی تعلیم کے حوالے سے بہت سی باتیں ہوتی رہتی ہیں۔ پچھلے دنوں ہمارے ایک تعلیم دوست صحافی کی وساطت سے ایک مضمون ایچ ۔ای۔ سی کے حوالے سے پڑھنے کو ملا تب سے عجیب کشمکش میں ہوں۔

سمجھ میں نہیں آ رہا کہاں سے شروع کروں جنرل پرویز مشرف اور ڈاکٹر عطاء الرحمن کی تعریف کروں کہ جن کی کاوشوں سے آج بہر حال اعلی تعلیم اور اعلی تعلیمی اداروں کی بہتات ہے یا ان تلخ حقائق سے پردہ اٹھاوں کے کس طرح بعض تعلیمی ادارے ناسور کا کام کر رہے ہیں۔

حکومت پاکستان نے ایچ ای سی کے ذریعے سے یونیورسٹی اساتذہ کو مفت پی ایچ ڈی کرانے کے لیے منصوبہ لانچ ہوا جس کا بنیادی مقصد صرف یہ تھا کہ ہماری یونیورسٹیز کو ایسے اساتذہ دستیاب ہوں جو عالمی شہرت یافتہ یونیورسٹیز میں پڑھنے کا تجربہ رکھتے ہوں۔

عوامی ٹیکسوں کے اس منصوبے نے متعدد سرکاری یونیورسٹیز کو اچھے ڈاکٹریٹ فراہم کر دیے اور کسی حد تک تعلیمی معیار پر بھی اس کا مثبت اثر ہوا۔ لیکن عوامی ٹیکسوں کے پیسوں پر جن اساتذہ نے فراڈ کیا ان کے خلاف ابھی تک کارروائی کیوں نہیں ہوئی؟ ہائر ایجوکیشن کمیشن کی جانب سے یہ ذکر کیوں نہیں کیا جاتا کہ پی ایچ ڈی اُدھوری چھوڑ کر غائب ہونے والے سکالر کی اصل ذمہ داری کس پر عائد ہوتی ہے؟

کیا ایچ ای سی نے ان اداروں کو پوچھا گیا کہ ان کے سکالرز کیوں ناکام ہوئے؟ کیا ان سوپر وائزرز کو پوچھا گیا کہ آپ کے سوپر وائزی کیوں ناکام ہوئے؟ کیا ان اداروں میں ہونے والی تعلیمی بد انتظامی کا کوئی ذکر کیا ؟ کیا سکالرز کے ہونے والے تعلیمی استحصال کا ذکر کیا ؟ کیا روز بروز دریافت ہونے والے فراڈ تعلیمی اداروں کا ذکر کیا؟

کیا صرف نجی تعلیمی ادارے ہی غیر معیاری ہیں؟ یا ہماری ارض پاک کے جھنڈے کے سائے تلے کوئی سرکاری تعلیمی ادارہ بھی معیار پر پورا اُترتا ہے؟

کیا من پسند وائس چانسلرز اور آگے ان کی من پسند افراد کی تعیناتی کا بھی اس ناکامی میں کوئی ہاتھ ہے؟

کیا ایسے اعلی سرکاری تعلیمی اداروں کی بھی نشان دہی کی گئی ہے جن میں سینئر ترین پوسٹس پر بھی اسسٹنٹ پروفیسرز لگے ہیں اور انہیں اپنے قیام سے لے کر آج تک گوہر مقصود ملا ہی نہی یا من مانی کے خوف سے ڈھونڈا ہی نہی۔

یہ بھی پڑھیں؛ ایچ ای سی کی اربوں روپے کی فنڈنگ سے پی ایچ ڈی یافتہ کہاں غائب؟

اس طرح کے متعدد سوالات ہیں جس کا ہائر ایجوکیشن کمیشن سے جواب مطلوب ہے اور ایچ ای سی کو فیکلٹی ڈویلپمنٹ پروگرام سکالر شپ کی تمام تر تفصیلات کو پبلک کرنا چاہیے اور ٹیکسوں کی یہ رقم کہاں کہاں ضائع ہوئی اس کے گوشوارے بھی ایچ ای سی ویب سائٹ پر دستیاب ہونا ضروری ہے۔

ایچ ای سی کو چاہیے تو یہ تھا کہ وہ محکمہ خارجہ امور کی وزارت کو اعتماد میں لے کر ایسے تمام سکالرز کے خلاف کارروائی کا آغاز کرتی جو مختلف ممالک میں روپوش ہوئے ہیں۔ اُن ممالک کی ایمبیسیز کو حکومتی سطح پر خطوط لکھوائے جاتے اور پھر ان مطلوب اساتذہ کو پکڑ کر واپس پاکستان لایا جاتا۔

اب جو اساتذہ پی ایچ ڈی مکمل کرنے کے باوجود بے روزگار ہیں اُن کا حساب کتاب کون دے گا؟ ایچ ای سی ریگولیٹری ادارہ ہے اور اسے ایسی پالیسیاں مرتب کر کے حکومت کے ذریعے نفاذ کرانا چاہیے جو اعلیٰ تعلیم اور اعلیٰ تعلیم یافتہ افراد کو تحفظ فراہم کر سکے۔

ایچ ای سی کو محض اس پر اکتفا نہیں کرنا چاہیے کہ شوریٹی بانڈز کی مد میں درج رقم کی وصولی کر لی یا پھر جرمانہ عائد کر دیے۔ سزا تو ایسی مقرر ہونی چاہیے تھی کہ آئندہ والوں کے لیے سبق ہو لیکن افسوس کچھ بھی نہیں ہوا۔

بیرون ممالک کی پی ایچ ڈی تو اپنی جگہ لیکن یہاں پر تو مقامی یونیورسٹیوں میں سکالر شپ پر پی ایچ ڈی کرنے والے کہاں رہ گئے اس کا بھی تو ایچ ای سی کو معلوم نہیں ہے۔ کسی بھی پراجیکٹ کی کامیابی کے لیے اس کا بالآخر تجزیہ کرنا ہوتا ہے تاکہ یہ جان کاری ہو سکے کہ مطلوبہ نتائج برآمد ہوئے ہیں کہ نہیں۔

ہائر ایجوکیشن کمیشن نے ویسے بھی آج تک صرف سرکاری اور پرائیویٹ یونیورسٹیز کو ہی ترجیح دی ہے لیکن سرکاری کالج کے اساتذہ سے کبھی کوئی سروکار ہی نہیں رہا گویا یوں لگتا ہے کہ ایچ ای سی ان اساتذہ کو اساتذہ تسلیم کرنے کے لیے تیار ہی نہیں ہے۔