جی سی یو: گلگت بلتستان ثقافتی میلہ، رقص و سرور کی محفل
- February 26, 2017 2:27 pm PST
لاہور
گورنمنٹ کالج یونیورسٹی لاہور میں گلگت بلتستان اور وادی ہنزہ کے طلباء نے اپنا ثقافتی دن انتہائی جوش و جذبے سے منایا، یونیورسٹی میں ثقافتی لباس اور لوک گیت سے پنجاب کے طلباء بھی لطف اندوز ہوئے۔
اس ثقافی میلے کو دیکھنے کے لیے ریئس جامعہ ڈاکٹر حسن امیر شاہ، چیئرمین شعبہ سیاسیات ڈاکٹر خالد منظور بٹ اور دیگر شعبہ جات کے انتظامی افسران بھی موجود تھے۔
ثقافتی میلے میں موسیقار اُستاد جابر خان جابر، اُستاد میر افضل، ، اُستاد فدا حسین اور طالب حسین نے اپنے فن کا مظاہرہ کیا۔
ثقافتی میلے میں یونیورسٹی کے مختلف شعبہ جات میں زیر تعلیم طلباء نے بھی حصہ لیا جبکہ اس موقع پر لاہور شہرکے مختلف اداروں کے طلباء کو بھی شرکت کی دعوت دی گئی تھی۔
اس ثقافتی میلے میں گلگت بلتستان کے علاوہ وادی ہنزہ کا روایتی رقص اور لوک گیت پیش کیے گئے جس سے حاضرین بے حد لُطف اندوز ہوئے۔
اُستاد جابر خان جابر کہتے ہیں کہ ثقافتی پہچان کو برقرار رکھنا نوجوان نسل کی ذمہ داری ہے اور گلگت کی ثقافت میں امن، بھائی چارہ اور سلامتی کا پیغام ہے۔ اس موسیقی کو سننے کے بعد دل و جان کو سکون محسوس ہوتا ہے اور جب دُھنیں کسی بھی شخص کو سنائی دیں تو وہ راحت محسوس کرتا ہے۔