کراچی

داؤد یونیورسٹی آف انجینئرنگ اینڈ ٹیکنالوجی کراچی میں مستقل وائس چانسلر کی تعیناتی کے لیے ڈاکٹر فیض اللہ عباسی کے نام کی منظوری دے دی گئی ہے۔ وزیر اعلیٰ سندھ سید مُراد علی شاہ نے داؤد انجینئرنگ یونیورسٹی میں وائس چانسلر کی تعیناتی کے لیے تین اُمیدواروں کے انٹرویوز کیے تھے۔

ان اُمیدواروں میں ڈاکٹر فیض اللہ عباسی، ڈاکٹر بھوانی شنکر، ڈاکٹر امداد اسماعیلی شامل تھے۔

ڈاکٹر فیض اللہ عباسی کی داؤد انجینئرنگ یونیورسٹی میں کو دوسری بار وائس چانسلر لگایا گیا ہے۔ وزیر اعلیٰ کی منظوری کے بعد قائمقام سیکرٹری بورڈز و جامعات نوید شیخ نے حتمی نوٹیفکیشن کے لیے سمری گورنر سندھ کو ارسال کر دی ہے۔ تاہم دو روز سے پرنسپل سیکرٹری صالح فاروقی کی گورنر ہاؤس میں موجودگی نہ ہونے کی بناء پر نوٹیفکیشن جاری نہیں کیا جا سکا۔

دوسری جانب جسٹس ریٹائرڈ دیدار ھسن شاہ کی سربراہی میں سندھ کی جامعات میں وائس چانسلرز کا تقرر کرنے کے لیے انٹرویوز کرنے والی سرچ کمیٹی نے لیاقت میڈیکل یونیورسٹی کے وائس چانسلر کے عہدے کے لیے اجلاس کر لیا گیا ہے۔

وزیر اعلیٰ ہاؤس میں منعقد ہونے والے اس اجلاس میں لیاقت میڈیکل یونیورسٹی کے وائس چانسلر کے لیے موصول ہونے والی 20 اُمیدواروں کی درخواستوں کی جانچ پڑتال کی جائے گی جس کے بعد شارٹ لسٹ کیے گئے اُمیدواروں کے انٹرویوز لیے جائیں گے۔