کراچی

کراچی پریس کلب کے باہر سندھ میں غیر معیاری تعلیم کے خلاف احتجاج ہوا، مظاہرین کی گورنر ہائوس کی طرف جانے کی کوشش پر پولیس نے پانی کی توپ چلائی ، آنسو گیس کے شیل فائرکئے اور 10 سے زائد افراد کو گرفتار کرلیا ۔

سندھ بھر میں غیر معیاری تعلیم کی فراہمی پر سول سوسائٹی کے تحت احتجاج کیا گیا، اس موقع پر رہنمائوں نے کہا کہ ہم نے چند روز قبل گورنر سندھ سے درخواست کی تھی کہ وہ ہمارے احتجاج کا حصہ بنیں ۔

رہنمائوں کا مزید کہناتھاکہ صوبے میں سرکاری تعلیمی اداروں کی حالت ابتر ہے، وزراء اپنے بچوں کو ان تعلیمی اداروں میں پڑھائیں تو انہیں عام آدمی کے بچوں کی تعلیمی سطح کا اندازہ ہو۔

مظاہرین نے ایک موقع پر گورنر ہائوس جانے کی کوشش کی تو پولیس نے واٹر کینن سے پانی پھینکا ، آنسو گیس کی شیلنگ کی اور مظاہرین کو گرفتار کرکے انہیں منتشر کرنے کی کوشش کی گئی۔ مظاہرین کا مطالبہ ہے کہ سندھ بھر کے سرکاری تعلیمی اداروں کا معیار تعلیم گرتا جا رہا ہے اور سہولیات کی عدم فراہمی کے باوجود حکومت کی تعلیم پر توجہ نہیں ہے ۔

سول سوسائٹی کے تحت ہونے والے اس مظاہرے کے شرکاء کہتے ہیں کہ پاکستان پیپلز پارٹی کی حکومت کی ترجیح میں تعلیم شامل نہیں ہے، سکولوں اور کالجوں کا کوئی پُرسان حال نہیں ہے لیکن حکومت کو کوئی فکر نہیں ہے۔

اس موقع پر مظاہرین کا کہنا تھاکہ وہ پریس کلب کے باہر دوبارہ احتجاج کرنے کے ساتھ صرف گورنر ہائوس ہی نہیں وزیراعلیٰ ہائوس کا رخ بھی کرسکتے ہیں۔