راولپنڈی

پنجاب بھر کے سرکاری سکولوں کے نویں جماعت کے طلبا کی بورڈ کے تحت انرولمنٹ فیس وصول نہیں کی جائے گی جبکہ پنجاب کے تمام تعلیمی بورڈز نے نویں امتحان کے لیے طلباء کی رجسٹریشن میں چوبیس مئی تک توسیع کر دی ہے۔

پچیس مئی سے لیکر آٹھ جون تک نویں جماعت میں رجسٹریشن کے لیے سنگل فیس کے ساتھ پانچ سو روپے جرمانہ وصول کیا جائے گا۔ لاہور بورڈ کے مطابق طلباء سے انرولمنٹ فیس کی مد میں 800 روپے جبکہ پراسسینگ فیس کی مد میں 395 روپے وصول کیے جائیں گے۔

مراسلے کے مطابق سرکاری سکولوں کے طلباء سے آٹھ سو روپے فیس وصول نہیں کی جائے گی تاہم ان طلباء کو 395 روپے پراسیسنگ فیس جمع کرانا ہو گی۔

انٹر بورڈز کمیٹی کی جانب سے چیئرمین بورڈز کو ہدایات جاری کی گئی ہیں کہ وہ اس فیصلے پر عمل درآمد کو یقینی بنائیں۔

انٹر بورڈز کمیٹی کے اس فیصلے سے صوبے بھر کے سرکاری سکولوں کے تقریبا پندرہ لاکھ طلباء وطالبات کو فائدہ ہوگا۔