لاہور

ہائر ایجوکیشن کمیشن کے چئیرمیں ڈاکٹر مختار احمد نے کہا ہے کہ دو سالہ بی اے اور ایم اے کی ڈگری ختم کرنے کا فیصلہ 2015ء میں کیا گیا تھا تاہم اس تجویز پر کام بارہ سال پہلے شروع کر دیا گیا تھا۔

ایچ ای سی لاہور کے ریجنل دفتر میں ڈاکٹر مختار احمد نے پریس کانفرنس کرتے ہوئے بتایا کہ 2014ء میں کمیشن کی جانب سے ایک کمیٹی تشکیل دی گئی تھی جس نے دو سالہ ڈگری پروگرام کو ختم کرنے کے لیے سفارشات مرتب کرنا تھیں اس کمیٹی میں چاروں صوبوں کے نمائندوں کو شامل کیا گیا تھا۔

ڈاکٹر مختار احمد نے پریس کانفرنس کے دوران بتایا کہ 2015ء میں پہلی بار تمام سرکاری جامعات کو خط لکھا گیا تھا جس میں نہ صرف اس فیصلے سے متعلق آگاہ کیا گیا تھا بلکہ انتباہ بھی کیا تھا کہ وہ انتظامات مکمل کریں۔

اُنہوں نے کہا کہ 2018ء کے بعد پرائیویٹ بی اے اور 2020ء کے پرائیویٹ ایم اے کا امتحان دینے کی آپشن ہی ختم کر دی جائے گی اور صرف چار سالہ بی ایس آنرز ڈگری کا مکمل نفاذ ہوجائے گا۔ صحافی کے سوال کے جواب میں ڈاکٹر مختار احمد نے کہا کہ چار سالہ پروگرام میں اگر کوئی طالبعلم دو سال بعد ہی تعلیم چھوڑنا چاہتا ہے تو اُسے ایسوسی ایٹ ڈگری دی جائے گی تاہم اگر وہ اس کے بعد دوبارہ تعلیم شروع کرنا چاہے تو اُس کی بھی قانونی طور پر اجازت ہوگی۔

لازمی پڑھیں؛ پاکستان سے دو سالہ بی اے اور دو سالہ ایم اے ڈگریاں ختم

ڈاکٹر مختار احمد نے اس پریس کانفرنس میں بتایا کہ یہ تاثر غلط ہے کہ ایچ ای سی نے صوبوں سے مشاورت کیے بغیر اس فیصلے کو صادر کر دیا ہے، اُنہوں نے بتایا کہ صوبوں کو پہلے سے ہی اس فیصلے سے متعلق آگاہی تھی۔

اُنہوں نے انتہائی افسوس کا اظہار کرتے ہوئے کہا کہ دُںیا بھر میں اس طرح کا پرائیویٹ امتحان نہیں ہوتا جس طرح کا پاکستان میں گریجویشن اور ماسٹرز کی سطح پر لیا جاتا ہے، پاکستان کو اب اعلیٰ تعلیم سے متعلق مزید اس طرح سے آگے نہیں چلایا جاسکتا۔

اُن کا کہنا تھا کہ پاکستان میں اس وقت سرکاری یونیورسٹیز کے ساتھ 3 ہزار 720 کالجوں کا الحاق ہے جہاں یہ دو سالہ ڈگری پروگرام کرایا جارہا ہے اور یونیورسٹیوں نے ان پروگرامز کو اپنی آمدن کا ذریعہ بنا رکھا ہے جس کی بناء پر مخالفت کی جارہی ہے۔

ڈاکٹر مختار احمد کہتے ہیں کہ ایچ ای سی پورے ملک میں ایک ہی طرح کا تعلیمی نظام نافذ کر رہی ہے اب 16 سالہ تعلیم بی ایس آنرز اور 18 سالہ تعلیم ایم ایس یا ایم فل کی بنیاد پر متعارف ہوگی گویا پاکستان کو عالمی معیارات کے مطابق اپنے ہائر ایجوکیشن سسٹم کو لاگو کرنا ہوگا۔

اُن کا کہنا تھا کہ ملک میں ہزاروں ایسے طلباء موجود ہیں جن کے پاس چار چار ایم اے کی ڈگریاں تو ہیں لیکن اُن کے پاس سکلز نہیں ہے کیونکہ جن مضامین میں وہ ڈگریاں رکھتے ہیں اُس کی مارکیٹ میں ڈیمانڈ نہیں ہے۔

اس معاملے پر اُن کا کہنا تھا کہ کراچی، پشاور اور لاہور میں ابتدائی طور پر ایسے طلباء کے لیے شارٹ کورسز متعارف کرائے جارہے ہیں جہاں اُنہیں سکلز بیسڈ ایجوکیشن دی جائے گی تاکہ اُنہیں ملازمتوں کے حصول میں دُشواری نہ ہو۔

یونیورسٹیز میں لیکچرر اور اسسٹنٹ پروفیسر کی کوالیفیکشن کے سوال پر ڈاکٹر مختار احمد نے بتایا کہ 2015ء میں جامعات کو ڈیڈ لائن دی تھی کہ وہ اسسٹنٹ پروفیسر کیلئے پی ایچ ڈی اور لیکچرر کیلئے ایم فل کی شرائط لاگو کریں تاہم اب ایچ ای سی نے آخری وارننگ جاری کر دی ہے۔ نئی بھرتیاں نئی پالیسی کے مطابق ہوں گی۔

اُن کا کہنا تھا کہ پاکستان کی سرکاری ونجی جامعات میں اساتذہ کی تعداد 41 ہزار ہے جن میں سے صرف 12 ہزار پی ایچ ڈی ہیں، پاکستان میں اس وقت 30 ہزار پی ایچ ڈی کا شارٹ فال ہے جسے پورا کرنا اشد ضروری ہے۔ ڈاکٹر مختار احمد نے بتایا کہ ملک میں 26 ہزار سکالرز ایم فل میں زیر تعلیم ہیں جو مستقبل میں یہ گیپ کم کرنے میں معاون ثابت ہوں گے۔