گجرات

یونیورسٹی آف گجرات کی چار کلیات کے ڈینز نے وائس چانسلر ڈاکٹر ضیاء القیوم کی پالیسیوں اور اساتذہ کے ساتھ تعصب پر مبنی رویہ کے خلاف چانسلر گورنر پنجاب کو استعفے بھیج دیے ہیں۔

استعفے دینے والے ڈینز کا موقف ہے کہ یونیورسٹی کے انتظامی اور مالی امور کی باقاعدہ انکوائری کرائی جائے، وائس چانسلر ڈاکٹر ضیاء القیوم سنگین خلاف ورزیاں کر رہے ہیں۔

تعلیمی زاویہ کو ملنے والی استعفیٰ کی کاپی کے مطابق ڈین فیکلٹی آف سائنسز ڈاکٹر محمد فہیم ملک، ڈین فیکلٹی آف آرٹس ڈاکٹر فارش اللہ یوسفزئی، ڈین فیکلٹی آف سوشل سائنسز ڈاکٹر فوزیہ مقصود اور ڈین فیکلٹی آف انجینئرنگ اینڈ ٹیکنالوجی ڈاکٹر سلمان طاہر نے مشترکہ طور پر اس استعفیٰ پر دستخط کیے ہیں۔

ڈاکٹر محمد فہیم ملک کے پاس دو کلیات کے ڈینز کا چارج تھا جبکہ یونیورسٹی کے صرف ایک ڈین فیکلٹی آف مینجمنٹ اینڈ ایڈمنسٹریٹو سائنسز ڈاکٹر ندیم صفوام نے اپنے عہدے سے استعفیٰ نہیں دیا۔

گجرات یونیورسٹی کے ان ڈینز نے واضح کیا ہے کہ جب تک وائس چانسلر ڈاکٹر ضیاء القیوم یونیورسٹی کے مفادات کے خلاف پالیسیوں، مالی، انتظامی بے قاعدگیوں کی تحقیقات نہیں کرائی جاتیں اُس وقت تک وہ بطور ڈین یونیورسٹی میں کام نہیں کریں گے۔

گورنر پنجاب کو استعفیٰ ارسال کرنے کے بعد مذکورہ ڈینز نے اپنے دفاتر میں کام کرنا چھوڑ دیا ہے، واضح رہے مذکورہ پروفیسر گجرات یونیورسٹی کے سینئر ترین اساتذہ ہیں جنہوں نے وائس چانسلر پر عدم اعتماد کا اظہار کر دیا ہے۔